Situación e División Parroquial

O Concello de Outeiro de Rei pertence á provincia e diocese de Lugo; integrado no conxunto da unidade xeográfica coñecida como A Terra Cha lucense, sitúase a 11 km da capital provincial. Limita polo Norte cos Concellos de Begonte, Cospeito e Rábade; polo Leste, co de Castro de Rei; polo Sur, co de Lugo e polo Oeste, co Concello de Friol.

Forma parte da comarca de Lugo e da "Mancomunidade de Municipios da Terra Cha" na que se inclúen ademais os municipios de Abadín, Castro de Rei, Pastoriza e Cospeito.

Xeograficamente está situado a 43º05’7’’ de latitude Norte e a 7º36’7’’ de lonxitude Oeste, sendo a súa extensión, de 134 km².

Conta con 5093 habitantes, 2624 homes e 2469 mulleres, distribuídos nas 172 aldeas nas que se organizan as 27 parroquias que compoñen o Concello: [Datos referidos á última revisión do Padrón , 1/01/2018].

A capital do municipio sitúase en San Xoán de Outeiro de Rei. Cunha extensión de 3,2 km² constitúe a segunda maior entidade de poboación, despois de Guillar, con 724 veciños distribuídos nos barrios de Barciela, Outeiro de Rei, Santa Isabel, Cantón e A Palloza.

Delimitada pola parroquia de Santa Mariña (dependente da súa xurisdición parroquial) polo Norte, Robra polo Sur, Bonxe polo Leste e Caboi e Martul polo Oeste; bañan as súas terras o río Miño e o arroio de Barciela.